2016年12月31日星期六

[露營生活] 深涌除夕三日兩夜 (2016-12-31 至 2017-01-02)

第一日早上
2016年的年尾,會到深涌渡過,倒數迎接2017 再玩多晚,三日兩夜,應該係露營最佳的時間長短,野食應該剛剛好,唔使補給,上次帶左個燒烤爐去無用武之地,今次會係出面大草原札營,所以一定要用佢,試下淘寶幾廿蚊貨仔。

細女捉住我隻腳,佢知我地出去玩,佢不知幾想跟埋去,老婆成日話佢細個,所以無得去。

出發時天氣好好,其實船程沿途風景都好靚。






遠拍觀音像,手機Zoom 近的質素,同DSLR 差好遠。

到步深涌碼頭,行十五分鐘入去,當時仲有好多位揀,跑上大斜坡向下影了一張。


我跑上去大斜坡,呢個位自成一角,又可以望返落深涌大草原,不過去到已經有人霸左,無乜位淨,不過都好彩無揀呢度。


最後揀左係離士多再遠一點的草地札營,係池塘邊可以遠望深涌士多景。又係唔識揀位起天幕,搞到個營同天幕個位騎騎呢呢。上手留低左D 膠枱膠櫈,應該係士多的,最後工作人員話可以隨便用。



呢次都係帶大女黎,細女又無份,又係老婆睇住。呢次帶左玩具同風箏黎,仲有上手留低左一堆玩具,大女今次唔會嗌悶。

新玩具,一步到位的KOVEA HARD10煮食套裝,同埋方便煮食可放KOVEA CAMP 1 爐頭的SNOWLINE鋁枱,套煲就好大件,不過裏面可以放野,張枱收納左就好細舊,又唔算重,不過因為我起營起天幕,我阿媽就搞呢張枱同煲糖水,個掛鈎掉轉左擺,不過當時我都唔為意。

望多次,都唔知點選解個營同天幕會起到咁。

天氣凍,個煲又大,D 水煲左好耐先滾,放腐竹的時候都已經天黑。

舅父舅母同表弟都係黃昏後先到,黎到都係即刻起營起天幕,跟住就喇喇聲燒野食。

個爐唔錯,不過我地無用佢原先個網,放個大D 的網就可以放多D 炭


食飽野吹夠水,臨訓前都係手機時間,勉勉強強都算收到訊號,等埋倒數完就訓覺。

半夜三點幾四點,突然一陣怪風吹甩左幾支天幕繩同營釘,小弟聽到聲忍唔住出去望,囉鎚揼返兩支,其中有支唔見左,由得佢個天幕無"林"就算,無用Y型釘都吹得甩,第二朝發現原來其中一支釘仲吹到十幾米外遠。


第二日早上
舅父佢地打算行一圈,因為尋晚夜晚先到黑蚊蚊無周圍去,仲去埋舅父一路想去的大斜坡上面,果度札滿晒營,佢地行左上去睇,仲聞到屎臭味,應該係有人就地解決,返到黎同我講好彩無去果度落腳。

唔好以為係早餐,其實係中午的野食,沖杯野飲,食個簡簡單單的餐蛋包,最重要係食環境,真係好寫意,三日兩夜的第二日係最寫意最輕鬆,要好好享受。




舅母又釣魚,不過今次係呢個魚塘就無乜斬鑊,之後就走左出去海邊釣。

雖然夜晚較黑,都細心都會發現舅父個天幕變左裝,因為收埋左我個天幕而用我果兩支天幕柱去做舅父的副柱,咁樣就算有風都無乜食風,而且行出行入好方便。


夜晚燒埋食淨的野食,同埋阿媽整左臘腸飯,係郊外的關係,D野食特別好食。食完飯吹下水,玩下手機,而我就試用GOPRO HERO 4 影星軌,失敗左。唔知環境唔夠黑定無真正的腳架,試左幾次唔係好得就無試,其實個天算清,但就唔係見到好多星,可能士多果邊光害大D,GOPRO 真係唔係好識搞,或者用大機應該會容易D,不過咁重無帶。


第三日早上
天氣一樣咁正,氣溫再高多少少,其實呢D係黎之前預知,天文台兩三天的預測都OKAY嘅。

可以見到今日個天幕依然畢挺,呢個配搭真係唔錯。




好曬好熱,收左個外帳透透氣。








其實呢度真係幾大,向士多反方向再行,有一片荒廢左的地,如果養返草仲可以擺到好多營,不過佢地個廁所已經超負荷。





差唔多下午三點,已經執拾好行裝預備閃人,舅父唔搭大船,搵左大飛走人,而呢次我地都JOIN 埋,我都係第一次搭!

仲有一個鐘頭時間就要出碼頭坐大飛Lu。

臨走不捨的心情驅使下,又再影一影呢個景。

大女比較大膽,坐緊大飛都笑容滿面。

見到風景幾靚,叫媽咪幫我地影張相先。

幫媽咪影返張。