[露營心得] 天幕防風繩長度 (起天幕, 風繩, 營繩, 落釘, 天幕柱)

一般係舖頭買返黎的營繩(防風繩)都係4米、5米和6米左右，如果自己買繩返黎剪栽做天幕的防風繩，咁應該要預幾多米好，多得滯就會條條fing，少得滯唔夠用就揼心，其實根據天幕柱的高度，係可以計返天幕柱頂同落釘位的距離，有左呢個距離，再預多小小做調節或綁結之用，就可以知道要幾長的繩至夠，而計算方法唔咁複雜只係用畢氏定理 a² + b² = c²。

而小弟主要用兩種"一人起天幕的方法"來定落釘位同防風繩的角度...

天幕柱落釘法

首先定好天幕柱的位置，之後將天幕柱向天幕的反方向打橫放在地上，天幕柱底仍然係B點，天幕柱頂就是C點，搵到C 點(如防風繩夠多，此處都可以落釘)，再將另一支天幕柱打直放近C點，天幕柱中間正正就是C點之上，而第二支天幕柱的兩端正正就是D和E點。

C、D和E都是可以落釘的位置，D和E的距離較遠，防風繩亦要較長些，∠ACB是45度，∠ADB和∠AEB大約是41.8度，以下就是用畢氏定理計算出來的結果。

45度角落釘法

首先定好天幕柱的位置，之後將天幕柱向天幕的反方向打橫放在地上，天幕柱底仍然係B點，天幕柱頂就是C點，搵到C 點(如防風繩夠多，此處都可以落釘)，再將天幕柱以柱底為圓心向上轉大約45度(直角90度的一半)，天幕柱頂就是D點，將天幕柱回歸BC的位置，再將天幕柱以柱底為圓心向下轉大約45度(直角90度的一半)，天幕柱頂就是就是E點。

C、D和E都是可以落釘的位置，C、D和E的距離一樣，都係天幕柱的長度，∠ACB、∠ADB和∠AEB都是45度，以下就是用畢氏定理計算出來的結果。

[露營裝備] [露營用品] 營繩 (防風繩) (風繩)

一個帳篷所包含的各樣配件中，營繩算係一般用家最無要求的一項，因為繩平，買帳篷和天幕時原裝大多數都包埋營繩和繩扣，原裝的營繩用落又無乜問題，就算質素差的都要用很多很多次才會斷，所以夠用用家就無再要求。

而很多時用家第一次起佢的天幕，先發現原來營繩唔係好夠，勉強起到，但唔算十分穩陣，有部份牌子會俾足晒營繩，天幕上的孔都有足夠的營繩綁住，但亦有一部份係俾唔足，要2米高的天幕柱用一條繩綁住就想挨一晚甚至兩晚，實在太難度高，小弟的第一次很幸運，雖然天幕都係俾唔足繩同繩扣，因為有很多長輩幫手，而自己又淘了些8mm粗的繩，原本諗住用黎做後備繩綁下其他東西，最後給一些長輩拿了去綁樹，第一次起的天幕穩陣得很，仲擋了好幾場雨。

雖然唔係攀石行山，但買定數十米的繩旁身係無防，一接觸返繩呢樣野，就諗起細個童軍的片段，雖然唔係做左好多年童軍，但記得一條繩可以好多用途，好多繩結可以打，就慢慢去搵心目中最佳的營繩，在淘寶都花了很多學費。

10個實用繩結 (1)　10個實用繩結 (2)　2個營釘結教學

一條好的營繩要有咩特點?

堅韌
要係戶外日曬雨淋，被風吹之餘仲要係帳篷天幕和營釘之間拉扯，堅韌係首要條件

彈性
有少許彈性的營繩可以卸去拉扯的力，係保護帳篷天幕的要素，彈性太多又會使營繩或繩扣容易變鬆，所以彈性少許就夠

反光
夜晚防止小孩或途人被絆倒，一個天幕要用的繩起碼8條以上，加上帳篷的營繩，基本上周圍都係繩，所以用反光的營繩，提醒自己及其他人

顏色鮮艷
即使係日間，用綠色泥色黑色白色的繩都會有機會眼花睇錯又跌一鑊，所以一般附送的營繩都係橙色紅色...等等

輕巧
其實營繩一般2mm至3mm 都夠用，唔同牌子唔同地方生產的繩重量都不同，露營講輕量化嘛

價錢
營繩呢樣東西，發覺一係好平，一係就好貴，無乜中價的產品，平嘅就係淘寶$1蚊1米，$50蚊就50米，貴嘅外國貨就百幾二百蚊先得30米，而係香港舖頭賣的都要$5蚊一米，價錢而言，算係中價貨，但賣嘅其實都係$1蚊1米的淘寶貨 :(

各款露營繩介紹...好伏

Logos 4mm x 30m
以為有牌子係大公司舖頭買無走雞，大陸造唔係問題，點知又粗又唔反光，唯有當普通繩用，呢款都要百幾蚊30米，完全唔值~ 唯一抵讚嘅係包裝上的營釘結教學。




淘寶貨3.5mm x 50m
$1蚊1米，顏色、紋理、質素仲好過Logos 4mm 果款，又夠實淨，係可惜唔反光，不過個人幾鍾意，用黎做浪衫繩或者綁下野都唔錯。




淘寶貨3mm x 50m
$1蚊1米，顏色、紋理、質素都唔錯，勝在反光，真真正正的營繩，唔夠樓上果款實淨，但都夠用了，可能仲好添，因為軟身少少的繩打結會實淨一點，香港舖頭賣$5蚊1米，其實都係淘寶貨，去淘寶買喇~




幾款營繩對比圖
由左至右分別為2mm(Naturehike) 3mm(淘寶貨) 3.5mm(淘寶貨) 4mm(Logos)
最左邊都係淘寶的Naturehike挪客平價貨，$12四條4m，內藏金屬線作反光，不過不失，但配個不合SIZE 的營繩扣，令營繩容易鬆掉。




淘寶貨1.8mm x 20m
$18蚊20米，超幼，算實淨，耐唔耐磨要試過先知，夜間能夠反光，做營繩夠晒輕量，可惜手頭上的營繩扣無咁細SIZE，而其他SIZE的營繩都仲有好多，唯有作掛物或綁物之用。




淘寶貨5mm x 10m 夜光
$12蚊10米，夜光效果不明顯，但勝在夠實淨，亦有一定韌力，這個粗度，買來當作繩索之用，做掛繩、綁樹、綁欄桿、連接天幕...等等。




NatureHike 8mm x 12m
$29蚊 12米，原先預用家當作營繩之用，可自行剪開每條3米，附送4 個快速營繩扣，以這個粗度用左營繩應該綽綽有餘，但當作繩子之用，連接天幕綁緊樹或欄桿，多用幾次就會"梅"，繼而斷開，實在不合格。




劣質淘寶貨3mm x 30m
同樣是$1蚊1米，但店主可能找不到足30米的繩給我，就用兩條繩然後火燒焊接給我，接駁位明顯之餘仲唔係好實淨，好似就想斷咁，呢款雖然反光，但質料很差，拿上手會被金屬線界手，第一次唔識買就中伏，最後諗住粗用，但用左幾次後都忍唔住被我掉左。




圖片來源:
深圳穿山甲户外运动
Selpa
naturehike旗舰店
山鹰户外运动装备

[露營裝備] [露營用品] 天幕

天幕的由一塊合成的防水布料加上兩至多支柱搭建而成，主要用途是遮擋太陽(防曬)，阻擋雨水(防水)，擋風，防止野外的東西墮下(如樹技，樹葉，雀糞等等)，如帳篷搭建在天幕下，更可為帳篷省去用後清潔保養的功夫。

選購天幕、天幕柱

選購天幕時，有幾個因素是必定要考慮，心目中的天幕尺吋大小、重量、形狀、顏色、用料、抗UV能力、抗水壓能力，支架(天幕柱/桿)材質等等，為何抗水壓能力排到後面，因為其實一般天幕都具有防水能力，應該足以應付香港的天氣，所以選擇形狀大小，重量，顏色相對重要些，當然如果所選的露營地點是駕車直到，重量因素就可以忽略，個人意見是天幕大小最好是帳篷的一倍大小，除了可以遮擋帳篷外，多出的位置可以當作前廳，可作煮食燒烤用餐耍樂休息之用~

有些天幕會連天幕柱一拼出售，有些則要另外購買，選購天幕柱可以考慮以下幾個因素 - 材料、長度(高度)、節數、粗幼，天幕柱的材料有鐵、鋁合金、鋁、碳纖維、鋼、玻璃鋼，日常露營用的天幕柱以鐵、鋁合金、較常見，不過因為鐵實在太重，現在都不是太多人用，鋁合金及鋁就相對受歡迎，不但輕身而且堅硬，價錢又便宜，最近亦有人會用更輕身的碳纖維，但價錢較昂貴，市面上亦不容易買到，碳纖維相對堅韌度不及鋁合金，如承受過大壓力時，會有斷裂的風險。

一般購買天幕都會有天幕繩(營繩，風繩)和調節片(營繩扣，風繩扣)附送，但不同牌子附送數量不一，小弟買的一款天幕都是兩支柱，左右各一撐起天幕，天幕前後邊位各有三個連接小孔，但只得八條營繩和營繩扣，實在不夠用，如果想天幕搭建後屹立不倒，一支天幕柱最少要綁上三至四條營繩，所以要自行預備更多營繩營繩扣。因為兩支柱都會有拉力向對方的方向拉，所以營繩綁上天幕柱而另一端朝天幕的相反方向平均分佈釘在地上，有時會受環境地形所限不能完全平均釘上(泥土鬆散，有石有樹等等)，但又有時因為環境地形可以作出變化執生，例如綁在樹上，欄杆上等等。

天幕的形狀

天幕的形狀主要分為蝶形，方形，多邊形，多功能天幕，個人覺得最實用當然是方形，亦有些蝶形的弧線做得不太過分都接近方形，這些都比較實用，真正遮擋的範圍較廣。有部份蝶形天幕，為了令重量再輕一點，造得過份流線形，尖的部份太多太尖，遮擋效用減少，並不是真真正正反映其呎吋大小。多功能天幕可因應天氣或人數作出變化，藉由拉鍊的開合營造一個密閉的空間，或捲起變化成門口，通風處，亦可用天幕柱撐起，令環境更加開揚，其多邊形設計令可作出的變化更多。

方形天幕

蝶形天幕

蝶形天幕

蝶形天幕

多功能天幕

圖片來源: 

https://www.msrgear.com/

http://www.snowpeak.com.tw/

天幕柱的結構

大多數的天幕柱是以三至五節組成，最頂頭會有一至兩吋長的幼鐵枝突出，天幕就是扣在上面，柱的底部會以尖頭形狀或軟膠套著，前者用於插穩在地上，後者提高摩擦力令天幕柱企穩，而高度多數達到兩米至三米之間，兩米半左右最多人使用，亦有低過兩米的天幕柱作副柱之用或撐起帳篷前廳的前門之用。有些天幕柱每節會以彈力繩相連，亦有些獨立分開，但兩種都是上一節套住下面一節，而有些可以調較高矮的天幕柱其中一節是可伸縮的，可因為環境作出調較。另外，有一款可調較高矮的天幕柱是一支過，最底果支最粗，最高果支最幼，收納時狀態是一支套住一支，多數是三節，有外鎖鎖實，節與節之間都可以調較長短，因為一體化所以收納了仍是很長，而且粗，攜帶時不太方便，但算是堅韌穩陣。

天幕柱除左材料外，粗幼其實都十分重要，一般粗幼大約在18mm至22mm之間，個人覺得盡量買最粗22mm或以上，記憶中網上見過25mm，但門市一般最粗都是22mm，因為見得太多遇到強風的天幕柱吹彎甚至折斷，往往去到野外天氣都很難預測，而且風都特別大，所以寧願重一點都買較粗的天幕柱。