[露營裝備] [露營用品] 戶外照明裝備 - 枱燈、燈帶 (露營燈)

枱燈

優洋LED創意枱燈 100A
其實這款只係用於書桌上的可夾枱燈，起初只是喜歡佢的柔光燈罩作產品攝影之用，不過它帶有夾子可夾住任何東西撐起燈箱，中間軟管可自由任意扭動，調整照射角度十分方便，配合高電量的行動電源可以長久使用，而燈箱四四方方，照射範圍廣闊，除左體積稍大之外，在戶外使用都十分方便好用，尤其需要對應不盡相同的郊外環境，所以到郊外燒野食或露營都會使用。光度有高中低三個檔次，最高光度達300流明，中亮光度都有一半150流明，我們多數帶兩個一左一右，用中亮檔次配合10400mAh行動電源，由黃昏開始天黑用到凌晨兩點，都可以用到兩晚電量還有剩。另外值得一讚是開關按鈕是輕觸式，雨水不太大都可以不用收起，只要用膠袋包著行動電源還可以繼續使用。

燈帶

滴膠防水LED 燈帶

外插USB 行動電源的燈帶，收起體積極細重量極輕，輕觸開關設計，按實可調光暗，光度十足，如掛在天幕下使用十分完美，因這一款是最長款式120燈，有一定程度的耗電，暫時試到使用10000mAh 行動電源，可用4小時多一點。

[露營裝備] [露營用品] 戶外照明裝備 - 營燈1、應急燈 (行山, 探險, 防身, 露營燈)

營燈

Black Diamond Voyager Lantern
買呢款營燈係俾佢的設計吸引左，買之前都猶豫左好耐，因為當時我都未開始露營，買返屋企真係擺，佢細少輕巧之餘，用4粒2A 電池，就已經有足夠的光度，最高光度75流明，按實開關掣任意調節光暗係Black Diamond 一貫特色，另外仲可以轉換模式，變成電筒，實用性算高，最後買左返屋企擺係書枱，有時臨訓打下機都會開住佢，半夜想搵野懶得開燈就會用佢個電筒。

不過好少返屋企，變左長擺之後，金霸王電池漏汁，整壞左盞燈，之後出左同款的新版本，流明高了一倍，襯大減價再買返擺係依家住緊果邊。

BEAL LT190 營燈
比Black Diamond Voyager 更輕巧，同樣是用4粒2A 電池，流明更高達190流明，同樣是按實開關掣任意調節光度，有電筒模式，不過係共用同一LED 的取巧方式，有好過無，同Voyager 價錢相約，有一款更細少的LT170，不過個人偏好呢款光一點，同埋用黃色設計個款靚少少，襯減價敗了一個回家，雖然好少返去以前屋企，經一時長一智，每次返去都會開下佢，以免電池漏汁事件再次發生。

山力士營燈 CC3
國內出品的充電式營燈，內置9900mAh鋰電池，有電量顯示，白光亮度分為三檔，最高可達550流明，另有兩檔是紅光高亮及紅光頻閃，作警報求救之用，IPX5防水等級，有USB 輸出，可替手機充電，電量足夠玩三晚再替手機充滿一次電，重315g。最特別是附有紅外線遙控，遠距離控制開關，唔需要每次都走入營帳內開關，十分方便，更貼心的是遙控其實是個小電筒，光度仲分高低兩檔，實在不得不讚。CC3 係一個十分理想性價比極高的營燈，值得推介。

luminAID PackLite Max 太陽能營燈

日間接收大陽光線充電，夜間吹氣成型可掛在營內或擺放在餐桌上照明，可浮起亦防水，除太陽能外亦可以USB 直接充電(1-2小時)，最高光度150流明，光度稍為不足，日間以太陽能充電時間亦較長(12-14小時)，收納時體積較小十分方便，產品100％不含PVC，所有組件均無鉛且符合RoHs標準。防護等級達IP67，適合夜間水上活動或作多天露營活動的營燈。行山舖頭開倉接近半價入手，因為佢的白光光線柔和，十分適合用作物件攝影時補光。

應急燈

優洋應急燈 Q8
國內品牌優洋生產的應急燈之中，我最喜歡的一款，外型討好，使用柔光燈罩，長200mm，闊36mm，最高光度180流明，4檔光度調節，另有一檔頻閃，兩支就足夠供室內產品攝影之用，戶外使用亦不失輕巧方便，內置2600mAh鋰電池，可惜電量不足以維持一整晚，需帶行動電源及帶多一支燈一充電一使用輪流替換，或使用較低檔次增加續航時間，幸好第三檔的光度都有120流明以上，戶外使用算不過不失。內置磁鐵可吸附鐵制品，兩端亦有小孔可加掛繩掛起，使用擺位更為方便。因為LED唔會因電量減低而變暗，所以無電時會一下子熄了燈，這一點值得留意。

優洋防水應急燈 Q7
可以說是Q8 的進階版，262mm長，比Q8 稍長一點，但電量多出一倍達5200mAh，防水防塵，防護等級達IP68，可於水下兩米使用，燈罩不是柔光罩，光度會更光，最高光度達350流明，但沒有Q8 用於拍攝補光時柔和。另設有USB 輸出，可作行動電源之用，減去了磁石，但兩端仍有小孔可加掛繩，還有電量提示，可以在無電一下子熄燈的情況出現前去充電。此款可上山下海的應急燈更為適合戶外使用。

優洋防水應急燈 Q7S
Q7 的超級版，392mm長，電量更多達10400mAh，同樣是防水防塵，防護等級達IP68，燈罩與Q7 一樣，最高光度達450流明，可續航八小時，同樣設有USB 輸出及電量提示，唯獨外型太長，攜帶有點不方便。但若使用中亮檔次足以應付三日兩夜中的兩個晚上。

[個人網誌] 與戶外(軍用)裝備的緣份

四年前，2013年年頭，1月22日係淘寶幾間商店買左幾件迷彩衫同褸，等左7日集運返到香港，就去收貨，機緣巧合，就係果次去收淘寶貨的集運公司DIMBUY，去果陣因為記錯樓層，去左18樓(DIMBUY 以前係19樓)，無意中發現一間好大的軍用裝備舖頭，裏面好多迷彩服裝，好多軍用裝備，不過價錢都幾貴，另一邊有一間細細的軍用裝備舖頭，專賣一個品牌的服裝同少量軍用裝備，同樣都有迷彩衫褲，當時都無乜特別感覺，仲覺得賣咁貴唔值，淘寶幾百蚊買到幾件。

     

行左陣上返19樓DIMBUY 收貨，點知返到屋企全部SIZE 細左唔啱著，唯一一件接受到的俾左老婆著，其餘都係好差的質地，有件厚的綿褸仲係臭臭地，洗衣機洗左一次都係咁，都唔知係唔係黑心綿，最後除左俾老婆果件，其他全部掉晒。

以後都唔幫襯淘寶買衫，心心不忿打算係香港搵下D 迷彩褸買，心裏忽然閃了一些記憶，就係18樓果兩間軍用舖，如果早七日俾我遇到果兩間舖，可能我就唔會係淘寶買~

於是13年2月頭就專程上去果兩間軍用舖睇睇，打算搵下有冇迷彩褸，首先去億力行搵到款雜牌子做緊特價，SIZE 大少少但係真真正正叢林迷彩，二話不說就決定要(不過到依家都仲未著過)。

之後再去永高行，竟然發現細舖獨家代理的品牌呢間舖仲有D 貨尾賣，仲做緊特價，以前好鍾意著多袋褲，覺得好方便，而D 軍褲就有呢個特性，基本上同多袋褲差唔多，但質料同縫合車工都好好多，剛好有啱SIZE啱心水的色 ，就買左兩條當返工褲著，著左四年都無穿無爛。

13年3月中，因為係淘寶買左D Figure (山寨)，想搵D 可以柔光一點燈令我可以影Product 相影靚D，起初搵唔到，只係買到三盞感應燈，我最欣賞係佢發出黎的光係好柔和，而我就係最想要佢果塊柔光罩般的燈殼，但因為感應燈時著時熄，係好難用黎影相，而且光度都不足。

13年4月中，終於俾我搵到間一睇就對佢的產品有信心的商店，買左一盞有夾枱燈同一支應急燈，枱燈要接USB囉電，應急燈就唔使，內置鋰電池，叉滿電就用得，當然香港係無呢D 鋰電的燈具賣，一般產品攝影係用燈膽 / LED板加攝影棚，呢次搵到好開心，不過最慘係送到黎簽收左先發現無左支應急燈，應該係國內物流果陣已經遺失，最後商店、物流同集運三方都唔認數，正仆街，無辦法自己硬食，後尾鴨寮街都已經有得賣，貴過淘寶連埋運費少少，不過費事又寄失，講價平少少買左兩支，真係好好用。

其實呢兩隻燈都可以戶外使用，唔算重，接10400mAh奶媽(行動電源)的夾枱燈續航力仲好強，同舅父去郊野公園燒野食都會帶去用，細雨都唔驚整壞。

13年4月尾再去果兩間舖睇下，其實心思思想買5.11 的MultiCam 迷彩褸，果款介乎軍褸同風褸之間，著出街都比慣容易接受，而且仲防雨水，試好左SIZE 就決定扑鎚(不過又係到依家都仲未著過)。

其後見到玻璃櫃有幾支電筒，係LED 電筒，要入18650電池，另有款式係可以直接叉電，售貨員好有誠意咁推介，佢就介紹我一支NITECORE 三百多元的電筒，360流明，現場睇都幾光，不過覺得價錢幾貴，同埋我想買果支係型仔好多同埋流明高好多，不過佢賣得仲貴，最後無買到淨係帶走件迷彩褸。

行完億力行再去永高行睇下，大舖就無國產牌子電筒賣，佢賣名牌子SUREFIRE，D 貨仲擺係售貨員後面，眼見得幾支，但記憶中又係貴到爆，都無諗住去問下細節，睇睇其他野無野買就閃，而我開始對果D電筒有興趣。

返到屋企上網做下功課，淘寶賣NITECORE 的價錢同香港舖頭一樣甚至再貴D，原來NITECORE 都已經推出左好多款的電筒，官方網頁的介紹好詳盡，係討論區搵到原來NITECORE 國產電筒鴨寮街都有得賣，而且價錢較平，於是去深水埗逛逛，果然價錢平一折，亦係13年4月尾買了我人生第一支鋰電池電筒 - NITECORE Precise Series P25 (SMILODON)。

自此之後，我就對照明工具產生興趣，經常行下軍用舖同鴨寮街，行旺角同深水埗已經成為習慣，因為旺角仲有好多運動戶外的舖頭，深水埗除左行鴨寮街，當然仲會行埋電腦中心，亦發現其實鴨寮街賣的大多都係淘寶貨，只不過要計下個差價，係邊邊買著數D 咁解。

圖片來源:
http://www.axes.com.hk
http://www.supremeco.com.hk/
http://nitecore.com/
优洋家居旗舰店