[露營裝備] [露營用品] 玩味SANRIO 各款公仔露營燈, 營燈15 (行山, 探險, 防身, 露營燈)

今次入手主要原因係平, 因為千色減左價只賣$59, 有白光, 黃光, 白光主要為照明, 亮度略為不足, 黃光閃爍營造營火的感覺, 都扮得幾似, 光暗亮度是以旋轉按鈕調較, 用黎作為小夜燈最適合不過, 呢個價錢玩味性質居多, 家居使用露營使用都可以, 入三粒2A 電, 因為電子門鎖換電後有好多未用完的2A電, 所以呢盞燈最合適不過, 等我可以清下D 2A電。

圖片來源: 茉莉生活百貨

[露營裝備] [露營用品] Claymore Lamp Athena_i 營燈13 (Claymor3) (行山, 探險, 防身, 露營燈)

韓國製造的 Claymore Lamp Athena_i 營燈, 亮度終於有所提升, 最高亮度800 流明, 最大賣點是它可以放驅蚊片, 熏蒸器發熱產生軀蚊效果, 內置 9800mAh 大容量電池, 提供較長的使用時間, 此營燈主要提供黃光(氣氛)為主, 3 種不同氣氛模式: Breeze(微風)、Sunset(日落)及Sunrise(日出)。

Breeze 模式 (色溫 1300K-1500K): 營火時光時暗的波浪光束, 最適合把酒談心

Sunset 模式 (色溫 1300K): 浪漫紅光, 最適合乜都唔做 Chill 返下

Sunrise 模式 (色溫 3000K): 黎明的光度, 較適合用此模式活動如玩遊戲, 閱讀, 煮食

營燈及驅蚊功能可獨立操作, LED 備有優質散射過濾器, 形成不會產生過度強光的優化光束, 燈罩使用了柔光罩, 直望都不太傷眼, 無段亮度調節, 單鍵操控, 備有電量顯示燈, 用淨幾多電, 幾時要叉電一目了然, 新品必備的USB-C 充電口, 另外亦內建三腳架螺絲孔, 可以鎖定於三腳架上。另外亦可配上吊掛式反射燈罩, 效果亦出奇地好。

產品沒有附送蚊片, 如用 Thermacell 的蚊片, 要剪走一小段才可放入熏蒸器上, 原來一般超市都沒有蚊片賣, 可能要淘寶或外國訂購~ (部份露營或行山鋪頭已經有售)

重量:	316g
電池容量:	9800mAh
尺寸:	102.6 x 85.3 x 60.5 mm
光源:	黃光
亮度:	29-800流明
充電時間:	3.5小時
連續使用時間:	8-88小時 (純照明) / 6-12小時 (軀蚊) / 4.5-11小時(照明+軀蚊)

[露營裝備] [露營用品] 一次搜鑼六款平價淘寶露營燈, 營燈12 (行山, 探險, 防身, 露營燈)

雖然係淘寶買應急燈露營燈都試過好多次, 不過之前都係幫襯優洋同埋山力士呢D 較出名的品牌, 而且價格都相對貴了少少, 呢次想發掘更多其他牌子, 價錢$100以下的露營燈, 不過呢次並唔係VS 大比併, 因為我所揀的每一款都唔同款色外型, 有些係明顯是照明用途, 有些則是氣氛為主, 希望找出超平、超值、最平、平價、性價比高、平靚正之選~ 始終淘寶產品, 電量流明數據我覺得可以參考下, 不過續航力我就唔多信, 實測後再補回數據, 經過一晚的測試, 大約都知道各款的露營燈的續航能力, 唯獨WARSUN方型露營燈會再測試多次, 因為用最高光度真係好光, 不過亦都令續航力變得唔太長。與時並進, 六款露營燈都是採用USB Type-C 充電口充電。

WARSUN方型露營燈 (約$78)

外型十分討好, 設計出色, 最寄於厚望的一款露營燈, 因為佢係咁多款之中電量最高, 可掛起, 可太陽能充電, 三檔亮度, 四種色溫 6500K 冷白光, 5500K 自然光, 4500K 柔和黃光, 3500暖色光, 電量, 色溫清楚標示, 可輸出電源, 亮度1000 流明, 電量4800 mAh, 仲有螺絲口扭上腳架之上。實測電量後, 發現產品係最高亮度時, 續航力只有約4 小時, 實在不合格, 不過最高亮度實在太光, 可以降一格再測試, 如果有8 小時或以上就算合格。最後測試埋第二亮度的續航力, 超過8 小時甚至9 小時, 呢個亮度足夠用一整個晚上, 總算合格。

WARSUN三葉草露營燈 (約$97)

外型像一支棍, 所以佢有電筒模式, 可磁吸, 另外就係佢一大賣點, 三葉式的光源, 放在桌面, 可以提供360度光源, 掛起後, 光源可調不同角度, 長按無極調光, 四格電量顯示, 可輸出電源, 亮度 50-450流明, 電量 2000mAh, 重179g。其實好多產品都濫用充電寶(尿袋, 奶媽)功能, 得果2000mAh, 幫手機充完電, 支燈又無電, 不過有總好過無。由於本身燈的最高亮度唔算太高, 而令其續航力不差, 約可使用6 小時, 不過此燈會因電量愈少光度會愈暗, 直至熄滅。

山趣户外松果露營燈 (約$43)

個外型同個款好熟口熟面, 不過唔好理, 都幾靚,十分平, 手感札實, 大小適中, 只有一粒按鈕, 亦是電量提示燈, 有四種燈光模式, 鎢絲暖光, 白光, 呼吸燈, 暖光加白光, 長按無極調光, 電量提示, 15%-100% 綠燈, 5%-15% 紅燈, 5%以下紅燈閃, 亮度 10-200流明, 電量 1200mAh, 重154g。略嫌電量少了一點, 如果燈上的掛環直接變成個扣會更加好, 唔掛起亦可平放在桌面上。因為電量太少, 續航力只有4 小時以內, 作為氣氛燈我個人覺得起碼要6 小時才算合格。

匡途燈籠花露營燈 (約$53)

同樣外型熟口熟面, 手感札實, 體積頗大, 亮度 150流明, 電量 2000mAh, 重170g, 充電位位於掛釣上, 亦即是整條電線吊住盞燈, 如果續航力足夠就無乜挑剔~ 電量實測後, 真心佩服, 首先佢知自己定位氣氛燈, 所以最高亮度 150流明, 電量 2000mAh, 最初頭係足夠的電力底下, 最高亮度可以維持多個小時, 之後會因應電量, 燈的光度會愈黎愈暗, 經過測試後, 竟然可以使用超過17 小時, 實在太利害, 直情可以通宵使用。

雅尼露營燈 (約$75)

典型營燈款式, 可掛可磁吸, 三種色溫 5900K 白光 , 4300K 自然光, 2900K 暖黃光, 再加呼吸燈功能, 長按無極調光, 四格電量顯示, 可輸出電源, 亮度 150-750流明, 電量 4500mAh, 重 162g。另一款令人讚嘆的露營燈, 此產品可調較的功能不多, 最高亮度足夠, 電量亦充足, 造就佢超長續航的能力, 它亦會因應電量減少, 燈的光度亦隨之減少, 令其可以續航超過17 小時, 其實個人覺得露營燈只要能用超過8 小時, 已經算合格, 以此露營燈的續航力, 直頭可以通宵運作。可惜, 之後兩次再購買都收到壞貨, 淘寶野始終都係有質量問題 😡

宿明太陽能户外燈 (約$33 發錯的貨)

其實係網上睇果陣都覺得伏伏地, 點知最後收貨真係伏左, 收到貨後拎上手已經發現內部有東西鬆脫, 試按開關後發現並不是每次都能著燈, 而且著左燈只要一搞盞燈佢就會熄, 諗住退貨退款之際, 看一看自己的淘寶帳戶, 原來連貨品都發錯, 原本貨品是21.5cm x 17.5cm, 但現在的貨品只有10cm x 10cm 左右, 現在只能按產品外表描述, 詳細規格都已經唔知係屬於邊個型號。

最後都係退貨退款, 上報晒D 野, 其實都UP 埋相, 之後收到客服回覆, 又問我囉相, 我又SEND 返我原先UPLOAD 果兩張相俾佢, 我同佢講, 唔同款, 尺寸又唔同, 佢秒回一堆字

「厂家新批次換尺寸了 我們規格图还沒來得及改 可以給您按700的补差 还是您寄回換貨呢」

其實佢呢句野有好多問題, 

1. 一個型號的產品, 可以立亂換呎寸, 都唔會由21.5cm 縮到10cm

2. 但佢又肯退返錢俾我, 當我買左700 果個型號

3. 唔揀退錢又肯換貨, 但廠家新批次都換左尺寸, 咁佢換咩貨俾我?

所以我揀左补差, 我都費時嘥時間寄返件野俾佢, 我要收多次佢件換貨, 仲要集運多次。

依家的情況係, 如果掛上樹, 著到燈, 都可以照用, 不過唔可以吹風, 一吹風就會熄, 其實10cm x 10cm 又幾的骰, 不過摸上手材質好粗糙, 太陽能充電, 可掛可磁吸, 四檔調光, 三種色溫, 有電量顯示, 亦可輸出電源, 一收貨D 軟膠按鈕已經甩甩地, 不過如果唔係佢發錯貨, 件貨又內傷, 其實性價比好高。

好彩買左六盞燈, 有5 盞都算滿意, 淘寶黎講算成積唔錯 :P

[露營裝備] [露營用品] FLEXTAIL 魚尾軀蚊燈 營燈10 (行山, 探險, 防身, 露營燈, 軀蚊)

FLEXTAIL 魚尾軀蚊燈

FLEXTAIL 呢次推出呢款軀蚊燈, 外型討好設計出色, 放軀蚊片的空間十分緊湊到位, 按鈕十分實淨, 不容易碰撞後意外開著, 機頂已配有掛扣, 機底有磁石可吸附左在鐵製品上, 亦有1/4 吋鏍絲口, 方便接在腳架上, 最高亮度400 流明, 可使用9 小時, 其次是200 流明續航13小時, 100流明續航25小時及50流明續航50小時, 電量4800 mAh, 個人覺得十分勉強, 如要著燈著軀蚊功能, 開一整晚, 相信只可以用Camping Mode 軀蚊, 以最低亮度開啟營燈, 而且只有IPX5 的防水級別。不過始終是國內生產, 性價比奇高, 隨機還附送Type C 充電線及保存盒一個。電量實測後, 最高亮度只能續航6-7小時, 勉強捱到一個晚上, 有機會再試軀蚊加營燈一齊試。

[露營裝備] [露營用品] Claymore Ultra2 3.0 X 營燈9 (Claymor3) (行山, 探險, 防身, 露營燈)

Claymore Ultra2 3.0 X

韓國製造的 Claymore Ultra2 3.0 X，摸上手手感相當札實硬淨， 比M Size 型號厚身少少, 機身採用鋁合金外殼，加配尼龍，堅固耐用，體積不大不小，最高亮度足夠，有5 段光度調校， 4 個操作按鈕: 開關掣、色溫調節、光度調節、SOS 模式， 電量比M Size 型號多出一倍，配備電量顯示燈，用淨幾多電，幾時要叉電一目了然， 新品必備的USB-C 充電口，另外亦內建三腳架螺絲孔，可以鎖定於三腳架上，IP65 防塵防水級別，十分適合戶外使用，亦可應付毛毛細雨的環境。

如果論外型比例, M Size 型號係比較靚仔順眼, 但論性價比, 買X Size 型號係無可置疑。

重量:	675g
電池容量:	23200mAh
尺寸:	125 x 115.6 x 55.8 mm
光源:	冷白光(6500K)、自然白光(4200K)及黃光(3000K)
亮度:	50-2200 流明
防塵防水度:	IP65
充電時間:	8小時
連續使用時間:	15小時 - 150小時