[露營裝備] [露營用品] [個人網誌] 終於入手露營背囊 OSPREY AETHER AG™ 70

前排推出2017年款OSPREY AETHER AG™ 70 時已經心思思想買，礙於價錢實在都幾貴，等到有大優惠八折時，但又只得Display 貨，最後無買到，買左第二隻牌子仲全防水，但揹落都係無Aether 呢隻咁好咁舒服，而且呢款想要的功能通通都有，都知自己一定走唔甩。

到左炎熱的暑假都無去露營，所以都無乜點留意露營裝備，反而著手搞呢個Blog，暑假完了，哈，又俾我遇到盤點清貨大減價，果間舖頭係公司附近開左新店，Lunch 食快少少走去睇下，當時目標仲有把迷彩大縮骨遮，都估到新款背囊無大優惠，不過正價貨品都有八折，睇完都係無買到，把迷彩大縮骨遮就有七折，以前買過把黑色，又係清貨入手，用左幾年殘殘地就黎壞，襯減價買埋迷彩款。

打算月尾去露營，買左的新營終於可以一試，但係3m x 3m 的內帳未有營底墊同防潮墊，好多舖頭都無，後尾搵到一間有營底墊就上去睇下，一如所料只係得營底墊，咁大的防潮墊都係無，唯有係淘寶買，計埋運費價錢其實差唔多，所以都係想睇實物摸上手，不過無就無辦法，剛巧果間舖頭最近返左好多OSPREY 背囊，仲有OSPREY AETHER AG™ 70，而又有八折，心思思就叫老細囉個新的黎睇下，無放野的收納SIZE 比想像中細，最後連營底墊一齊入手，不過果間舖頭無原裝雨罩(Rain Cover) 賣，第二日去返大舖買，盤點清貨大減價有八折，價錢竟然同公司附近的分店唔同，平左$40 蚊，奇怪。

咁大的Rain Cover 收納的SIZE 竟然咁細，而且仲好輕。

買OSPREY 背囊後登記，就會送鎖匙扣一個，都幾靚~

[露營心得] 露營背囊執拾法

露營背囊執拾的方法，這個口訣是根據網上普遍的說法，小弟稍為修改少少

方便取用，善用間隔；上重下輕，左右平衡；減重慳位，盡用空間

方便取用，善用間隔 - 露營物品的既定位置

為左方便，有部份露營物品其實都有佢的既定位置或者個人意願的擺放位置，有時未必分輕重去擺放

常用物品　　－　背囊頂部外袋、側袋、腰間小袋子
水樽　　　　－　背囊頂部、側袋
緊急物品　　－　背囊頂部、腰間小袋子、外袋
藥物　　　　－　背囊頂部內袋
文件紙張　　－　背囊背部內袋(水袋位)
薄身的東西　－　背囊背部內袋(水袋位)
保暖毯　　　－　背囊背部內袋(水袋位)，緊急性無雨衣咁趕急，同文件一樣，因為單薄，
　　　　　　　　只要打開背囊伸手就可以拿出來
睡袋　　　　－　背囊底部
非充氣地蓆　－　背囊外底部的帶扣，體積大但輕身，放在外面不佔用背囊空間
衣服／襪　　－　分開擺放填保背囊剩餘的空間

上重下輕，左右平衡 - 露營背囊內物品重量分佈

先將攜帶的物品分為重量級，中量級，輕量級

重量級 - 營幕、濕糧、罐頭、燃料、金屬工具、水
中量級 - 營幕、煮食用具、床墊、乾糧、厚衣服
輕量級 - 睡袋，枕頭，薄衣服，非充氣地蓆

現今的營幕(帳篷)重量範圍很廣，所以要根據閣下的營幕來分類為重量級或中量級

圖片來源: 網上流傳，估計應該從雜誌或書藉掃描出來~

減重慳位，盡用空間

• 器皿可以再放其他細小些的物品
• 罐頭食物先放密實袋
• 煮食用具用同類型燃料，電器用相同電池
• 做好準備，電器換好新電/充滿電，行動電源、後備電池都唔洗帶咁多
• 新工具/用品先拆除無用的包裝和膠袋
• 用衣服/襪去填補背囊剩餘的空間
• 最重的東西放手推車:p

[露營心得] 選購露營背囊

露營背囊牌子款式多之餘，設計和功能都已經很成熟,，背囊乃潮物的一種，所以無辦法買果陣一定係考慮牌子、外形同顏色先，當然要揹得舒服喇，一般買較出名的牌子都應該無乜野投訴，其次就是容量和功能，現代人露營已經十分豪華，所以背囊都係買容量大一點，連月亮椅或輕巧的帳篷都可以放進去，有部分牌子很好，已經分開男女設計，同一容量仲分為大中細碼，亦有些背帶可以調較，適合不同身型身高的人仕，使其背部更貼服，配合負荷/負重系統，揹起上黎更舒適。

一些好的露營背囊係即使放進了物件產生重量，但提起背帶或揹在背部時感覺的重量是減少了的，如果係女仕，小弟會建議買一些背囊本身淨重係輕一點，其次係容量低一點(視乎需要)，雖然專業的露營背囊有乜乜負重系統，物物反地心系統...等等，但始終都係張所有野揹上身，背囊淨重都很重要，因為小弟都有玩攝影，一般DSLR 再加鏡頭都已經很重，所以會要求個背囊可以偷輕幾多得幾多，女仕們盡可能放一些較輕的東西，粗重野都係等男仕做喇，如果係一班女仔去露營，就盡量安排重野放手推車(朋友號)。

至於各牌子的背囊功能都大同小異，以下都是小弟覺得最好要有的功能

• 胸帶和腰帶，扣上拉緊後可將背囊緊貼身軀，腰帶要有袋可放細小雜物
• 背部的散熱設計，保留空間去散熱排汗透氣
• 左右側袋，可以放飲料放雜物
• 放行山杖的扣帶
• 背囊主袋分上下隔(亦可拆除)，可以分隔開睡袋，充氣式床墊，枕頭，衣服和其他露營用品
• 雨罩(無就要配一個，以防萬一)
• 背囊底有帶可綁非充氣床墊或帳篷，可唔可以兩手FING FING就靠佢
• 背囊面的網袋，方便放雜物如地圖，風褸，輕便雨衣，繩，紙巾，電筒，頭燈...等等

VAUDE Brenta 50

VAUDE Asymmetric 52+8

Mountain Hardwear South Col™ 70 OutDry

OSPREY AETHER AG™ 70

GREGORY BALTORO 65

圖片來源:

https://www.ospreypacks.com/hk/en/
http://www.mountainhardwear.com/
http://www.overlander.com.hk/
https://www.trekkinn.com/
http://nzbushadventures.blogspot.hk/2014/02/pack-vaude-brenta-55.html