網址：https://www.protrek.com.hk/
會員制度：https://www.protrek.com.hk/index.php/membership
有多間分店(地舖或商場內)，亦有網店，網店只有部份產品，多年前係馬鞍山店(已關門) 買生日禮物俾老婆，買夠指定金額做了會員，仲有禮金卷送，一舉兩得。
會員制度分明，折扣清晰，基本上每件產品的折扣都一樣，我只需要記住自己買野85折(Haglof 除外或指定產品除外)就得，購物同時亦可以賺積分，每樣代理或售賣的產品算是高級至頂級的產品或外國的知名品牌，係度買野基本上無乜可以投訴，雖然有部份產品價錢昂貴，但有生日優惠，在FB 經常會做產品優惠推廣，捕啱時機有時都可以執平野，一年中亦有兩次左右的開倉清貨。店員十分NICE，而且大多經過培訓，有一定的戶外裝備知識。
網址：https://www.reecho.hk/zh/
網店網址：https://www.reechoshop.hk/
會員制度：-
有多間分店，舖面夠大，裝備齊全，亦有網店，網店只有部份產品，開始露營後續步添置裝備，買夠指定金額做了VIP 會員。
會員制度簡單直接，會員9折，VIP 85折，基本上每件產品的折扣都一樣，俾錢前再問問confirm 就可以，雖然與Protrek 代理的產品不太一樣，但其產品的品牌都係高級至頂級的外國的知名品牌，係度買野基本上無乜可以投訴，另外亦有re:echo 自家推出的產品，自己未買過re:echo 牌的產品，老婆買過戶外短褲，評語都幾好，除左生日優惠，間唔中都會做清貨大減價，而且係直接係舖頭做，十分方便。
網址：https://rcoutfitters.net/
會員制度：https://rcoutfitters.net/pages/%E6%9C%83%E5%93%A1%E8%A8%88%E5%8A%83
有多間分店，以旺角總店舖面最大，裝備齊全，亦有網店，網店售賣大部份產品，開始露營後續步添置裝備，買夠指定金額做了VIP 會員，再加$50做了永久VIP。
會員制度簡單，會員9折，VIP 85折，除了部份公價貨品和特價貨品，購物同時亦可以賺積分，剛好與Protrek 和re:echo 代理的產品不太相同，所以每次尋寶呢三間舖都係鐵腳， 同樣大部份產品都係高級至頂級的外國的知名品牌，係度買野基本上無乜可以投訴，另外亦有香港戶外品牌TRITON 的產品，營帳方面相對屬於入門級別，不過小弟買過一隻Triton Tribal 2 二人營，用落都唔錯，都經得起風雨(非山上)。
網址：https://www.chamonix.com.hk/
會員制度：購物滿$3000可成為永久VIP
一間旺角店，舖面十分大，裝備齊全，每逢大時大節就會做優惠，現在抗疫期間都做緊優惠，滿$1500 就7折，都十分唔錯，雖然舖面十分大，但貨量都很多，印像中無做過清貨優惠，貨品過於堆叠，每次上到去都好有尋寶FEEL，部份熱賣貨品經常無貨，有些貨品就有好多舊貨，小弟經常想做VIP，但仲未遇到啱SIZE啱色的始祖鳥防水外套，產品有歐美品牌，亦有賣國內品牌，札根香港很多年，行旺角都一定要上下去。
沙木尼舖頭已經更新，請看這裡
網址：https://www.overlander.com.hk/
會員制度：https://www.overlander.com.hk/member_ship_plan
折扣專頁：https://www.overlander.com.hk/discount
旺角和銅鑼灣兩間Base Camp，再加上多間商場舖頭，很容易搵到The Overlander 的踪影，小弟多年來都只係普通會員，要做VIP會員，我估我多數都係買靚靚營帳就一步到位，但呢一兩年見到香港D 牛牛同野豬咁激進，開始打消買靚靚營的念頭，所以我都係做唔到VIP 或金卡會員，不過連VIP /金卡會員都有期限，都係有D 難搞，除左會員制度麻煩之外，每項產品都唔同折扣，又係麻X煩。再加上果個會員APP，登出左或轉手機都係要搞一輪，就煩上加煩。
但係12 樓真係好好行，有部份大型裝備，得佢地先有，與前面四間舖頭售賣的產品不盡相同，都有佢值得行的地方。
網址：http://www.wellmount.hk/
會員制度：http://www.wellmount.hk/?ch_%E6%9C%83%E5%93%A1%E5%84%AA%E6%83%A0,87
旺角樓上舖，大部份貨品屬於入門級別，最記得係果度買過營繩，一米一米咁度，不過最難忘的一次，就係買錯左個鋁煲，已經離開左舖頭，之後唔知去左邊度，諗諗下都係厚住面皮去問下可唔可以換其他野，最後店員/老闆好好人，俾我加錢買過另外的產品，所以之後都去果度買天幕等等露營裝備，做埋會員，不過會藉得一年期限，已經過左期了。
網址：http://www.x-markgears.com/
會員制度：無
旺角樓上舖，都係最近一年先上去行下，麻雀雖小，露營產品應有盡有，大多係近期最Hit 的產品，前排先買左盞小營燈，不過就無會員制，只係有優惠，白色價錢就有85折8折，紅色價錢就無折。
網址：http://www.howa.com.hk/
會員制度：購物滿$1500 即可成為會員
旺角和尖沙咀的樓上舖，因為唔太就腳，所以記憶中去過一兩次，因為係旺角店買左張露營枱做左會員，之後去過尖沙咀舖一次，買左個吹氣枕頭，直到依家唔知會藉會否過期，舖面唔算大，但產品應有盡有，除露營外亦有賣水上活動裝備，亦有網店，網店售賣大部份舖頭的產品。
網址：https://shop.supremeco.com.hk/
會員制度：無
家樂坊18樓，其實係軍用品舖頭，不過大部份的產品都可以戶外使用，例如服裝、背囊、刀具、電筒、求生用品…等等，大部份產品都無折扣，亦無會員制，可能有部份產品有獨家代理，所以唔憂無生意，員工好NICE，有問必答，買Mystery Ranch背囊仲會幫你調較好，雖然我成日行，但唔係次次都買野，員工都認得我，因為我無打War Game，所以有部份產品唔啱使，主要係搵有咩啱戶外用露營用，另外亦有網店，很特別，打八號風果陣會有優惠，大家要特別留意一下，我都係打風果陣係網店入手Mystery Ranch背囊，因為家樂坊好幾層都有其他舖頭可以行，所以又係行旺角必到之處。
永高行舖頭已經更新，請看這裡
網址：https://www.axes.com.hk/
會員制度：購物滿$1000 即可成為會員
家樂坊18樓，另外仲有仁安店，同樣係軍用品舖頭，售賣的產品無永高行咁多，以5.11 和Oakley 為主，多年前買落的5.11 衫褲，因為太襟著，都唔需要再添置，軍用品就係咁，好襟用，近年都係去睇下電筒，營燈和刀具，間唔中網店實體店都會有優惠，網店只有部份產品。
為左係熄晒燈的情況下，繼續進行我的工作，習慣左夜晚家人訓左覺後我就用頭燈， 試過用到頭帶鬆晒，又試過用爛左一隻頭燈，一年前開始轉用Black Diamond Spot325，有轉MODE 掣，方便好多，但都仲係要入電池的頭燈，因為我係用叉電，所以每次無電都要換電同叉返D舊電，最近開始感覺到D 叉電好似就黎到期，諗諗下其實應該買隻充電式的頭燈就唔洗咁煩。
其實BD一向都有充電式頭燈，一隻ReVolt，一隻Icon，其實係特賣場我都買過隻舊版ReVolt，貪平，買返去先知，其實ReVolt都係用充電池，但就可以直接插USB 幫個充電池充電，所以其實佢都係可以用普通3A電，最後隻頭燈俾左老婆用，佢有先見之明，佢話充電式方便D。另外一隻Icon，上網Search 下就知呢款好大陣仗，價位又高，流明光度都好高，屋企用就浪費左。仲有兩款跑步用頭燈，Sprinter 275同Sprint 225，Sprint 225 略嫌光度爭少少，Sprinter 275 都係入充電池，所以都不在考慮之列。
所以就想搵隻平平地又係充電式的頭燈，一輪資料搜集之後，發現NITECORE 有幾款，NU25，NU32同NU35，其實外型就NU32同NU35型仔D，NU35我就一定唔會買，我就係唔想入電池，佢就又可以入電池又可以叉電，NU25就超輕得28g，最高亮度360流明，係屋企用就啱晒(同埋有我鍾意的黃色)，唔好見佢只係得兩粒掣，其實有好多模式可以玩，有得賣的鋪頭，樓上鋪同網店，都賣得幾貴，最後去左鴨寮街買，價錢仲低過貼係產品上的標價。
記憶中呢種型狀的營燈都係入電池式居多，而呢款就係充電式，其實都出左好一段時間，較為出名都係Goal Zero 同 Ledlenser，最後揀左呢款入手，主要因為呢款靚仔簡單方便價錢平D，估計如果出下一代會再提高亮度，150流明係營外如果多人就唔係幾夠用，不過放係營入面就還可以。
正因為係充電式，所以成支燈都可以造到咁細小，而我買呢款係Lighthouse Micro Flash，仲有另一款係Lighthouse Micro Charge，佢比Lighthouse Micro Flash長身少少，多左個USB 插頭位，駁叉電線可以幫其他野充電，但其實佢只係得2600mAh，用晒成支燈的電都叉唔爆一部手機，如果出下一代首先要提高電量先，雖然唔係貴好多，但我都係揀返Lighthouse Micro Flash，體積再細小D 更加的骰可愛。
