橙色新款(ST-486RG) 的火槍係o係行山舖做大減價時入手，因為好記得之前行舖頭售貨員講過呢款可以用邊爐氣，以前果款唔得。但其實迷彩舊款(ST-480RT) 我都係入左邊爐氣，又用得好地地，但都對新款有興趣，可以名正言順用邊爐氣好似安心D。
終於等到大減價，又記得買，其實係油麻地分店睇野果陣都唔記得買，之後好彩經過旺角又醒起仲有一間分店係附近，就上去買左，但今次經歷又係R 爆頭，上到舖頭都一心想買，話晒都有六幾折，唔係時時有，但同售貨員講起件貨果陣，佢地又話唔入得邊爐氣，同一間行山舖，之前第二位售貨員係實牙實齒話呢款用得邊爐氣，點解今次兩個售貨員都話唔用得又話用火機GAS，又話用高山氣又加Adapter，搞到一頭霧水，最後唔理佢地俾錢走人，仆街，個盒都寫住可以用邊爐氣。
最後再返屋企睇埋youtube 片，可以肯定兩款都可以用邊爐氣直接入GAS，反而用高山氣就要用Adapter，所以好多時售貨員都係信唔過。
而今次新款除左外型唔同之外，其實仲有第二款型狀的係筆直型，個人偏向鍾意L 型，新款對比舊款除左多顏色選擇，仲有就係有蓋，但無左按鈕鎖，新款係著火之前要開蓋，舊款係著火之前要解鎖，但新款就無伸縮，其實舊款的伸縮功能十分可取，始終離火源遠一些，不過整體感覺就係新款札實D，感覺跌跌撞撞都唔會咁易壞。
SOTO Micro Torch Active 微型火槍(點火器) ST-486RG
- 重 45g
- 集中式火焰輸出，溫度可達攝氏1,300度
- 增強防風性，戶外使用更方便
- 設有防塵蓋，可保護噴火口
- 底部旋轉設計，調整火焰大小比舊款更容易
- 保留了透明窗可隨時監控瓦斯的存量
- 保留了預留綁繩的用的孔，比舊款大一些
SOTO Slide Gas Torch 伸縮防風火槍(點火器) ST-480RT
- 重 50g
- 火焰溫度可達攝氏1,300度
- 火槍頭可伸縮，能延伸約7.5cm 左右的長度
- 火槍頭在伸或縮時皆可點火
- 點火按鈕有安全鎖，解鎖後才能點火
- 噴火槍上有透明窗可隨時監控瓦斯的存量
- 末端還有預留綁繩用的孔
