2023年11月14日星期二

[露營裝備] [露營用品] 一次搜鑼六款平價淘寶露營燈, 營燈12 (行山, 探險, 防身, 露營燈)

雖然係淘寶買應急燈露營燈都試過好多次, 不過之前都係幫襯優洋同埋山力士呢D 較出名的品牌, 而且價格都相對貴了少少, 呢次想發掘更多其他牌子, 價錢$100以下的露營燈, 不過呢次並唔係VS 大比併, 因為我所揀的每一款都唔同款色外型, 有些係明顯是照明用途, 有些則是氣氛為主, 希望找出超平、超值、最平、平價、性價比高、平靚正之選~ 始終淘寶產品, 電量流明數據我覺得可以參考下, 不過續航力我就唔多信, 實測後再補回數據, 經過一晚的測試, 大約都知道各款的露營燈的續航能力, 唯獨WARSUN方型露營燈會再測試多次, 因為用最高光度真係好光, 不過亦都令續航力變得唔太長。與時並進, 六款露營燈都是採用USB Type-C 充電口充電。


WARSUN方型露營燈 (約$78)

外型十分討好, 設計出色, 最寄於厚望的一款露營燈, 因為佢係咁多款之中電量最高, 可掛起, 可太陽能充電, 三檔亮度, 四種色溫 6500K 冷白光, 5500K 自然光, 4500K 柔和黃光, 3500暖色光, 電量, 色溫清楚標示, 可輸出電源, 亮度1000 流明, 電量4800 mAh, 仲有螺絲口扭上腳架之上。實測電量後, 發現產品係最高亮度時, 續航力只有約4 小時, 實在不合格, 不過最高亮度實在太光, 可以降一格再測試, 如果有8 小時或以上就算合格。最後測試埋第二亮度的續航力, 超過8 小時甚至9 小時, 呢個亮度足夠用一整個晚上, 總算合格。


WARSUN三葉草露營燈 (約$97)

外型像一支棍, 所以佢有電筒模式, 可磁吸, 另外就係佢一大賣點, 三葉式的光源, 放在桌面, 可以提供360度光源, 掛起後, 光源可調不同角度, 長按無極調光, 四格電量顯示, 可輸出電源, 亮度 50-450流明, 電量 2000mAh, 重179g。其實好多產品都濫用充電寶(尿袋, 奶媽)功能, 得果2000mAh, 幫手機充完電, 支燈又無電, 不過有總好過無。由於本身燈的最高亮度唔算太高, 而令其續航力不差, 約可使用6 小時, 不過此燈會因電量愈少光度會愈暗, 直至熄滅。



山趣户外松果露營燈 (約$43)

個外型同個款好熟口熟面, 不過唔好理, 都幾靚,十分平, 手感札實, 大小適中, 只有一粒按鈕, 亦是電量提示燈, 有四種燈光模式, 鎢絲暖光, 白光, 呼吸燈, 暖光加白光, 長按無極調光, 電量提示, 15%-100% 綠燈, 5%-15% 紅燈, 5%以下紅燈閃, 亮度 10-200流明, 電量 1200mAh, 重154g。略嫌電量少了一點, 如果燈上的掛環直接變成個扣會更加好, 唔掛起亦可平放在桌面上。因為電量太少, 續航力只有4 小時以內, 作為氣氛燈我個人覺得起碼要6 小時才算合格。


匡途燈籠花露營燈 (約$53)

同樣外型熟口熟面, 手感札實, 體積頗大, 亮度 150流明, 電量 2000mAh, 重170g, 充電位位於掛釣上, 亦即是整條電線吊住盞燈, 如果續航力足夠就無乜挑剔~ 電量實測後, 真心佩服, 首先佢知自己定位氣氛燈, 所以最高亮度 150流明, 電量 2000mAh, 最初頭係足夠的電力底下, 最高亮度可以維持多個小時, 之後會因應電量, 燈的光度會愈黎愈暗, 經過測試後, 竟然可以使用超過17 小時, 實在太利害, 直情可以通宵使用。


雅尼露營燈 (約$75)

典型營燈款式, 可掛可磁吸, 三種色溫 5900K 白光 , 4300K 自然光, 2900K 暖黃光, 再加呼吸燈功能, 長按無極調光, 四格電量顯示, 可輸出電源, 亮度 150-750流明, 電量 4500mAh, 重 162g。另一款令人讚嘆的露營燈, 此產品可調較的功能不多, 最高亮度足夠, 電量亦充足, 造就佢超長續航的能力, 它亦會因應電量減少, 燈的光度亦隨之減少, 令其可以續航超過17 小時, 其實個人覺得露營燈只要能用超過8 小時, 已經算合格, 以此露營燈的續航力, 直頭可以通宵運作。


宿明太陽能户外燈 (約$33 發錯的貨)

其實係網上睇果陣都覺得伏伏地, 點知最後收貨真係伏左, 收到貨後拎上手已經發現內部有東西鬆脫, 試按開關後發現並不是每次都能著燈, 而且著左燈只要一搞盞燈佢就會熄, 諗住退貨退款之際, 看一看自己的淘寶帳戶, 原來連貨品都發錯, 原本貨品是21.5cm x 17.5cm, 但現在的貨品只有10cm x 10cm 左右, 現在只能按產品外表描述, 詳細規格都已經唔知係屬於邊個型號。

最後都係退貨退款, 上報晒D 野, 其實都UP 埋相, 之後收到客服回覆, 又問我囉相, 我又SEND 返我原先UPLOAD 果兩張相俾佢, 我同佢講, 唔同款, 尺寸又唔同, 佢秒回一堆字

「厂家新批次換尺寸了 我們規格图还沒來得及改 可以給您按700的补差 还是您寄回換貨呢」

其實佢呢句野有好多問題, 

1. 一個型號的產品, 可以立亂換呎寸, 都唔會由21.5cm 縮到10cm

2. 但佢又肯退返錢俾我, 當我買左700 果個型號

3. 唔揀退錢又肯換貨, 但廠家新批次都換左尺寸, 咁佢換咩貨俾我?

所以我揀左补差, 我都費時嘥時間寄返件野俾佢, 我要收多次佢件換貨, 仲要集運多次。

依家的情況係, 如果掛上樹, 著到燈, 都可以照用, 不過唔可以吹風, 一吹風就會熄, 其實10cm x 10cm 又幾的骰, 不過摸上手材質好粗糙, 太陽能充電, 可掛可磁吸, 四檔調光, 三種色溫, 有電量顯示, 亦可輸出電源, 一收貨D 軟膠按鈕已經甩甩地, 不過如果唔係佢發錯貨, 件貨又內傷, 其實性價比好高。


好彩買左六盞燈, 有5 盞都算滿意, 淘寶黎講算成積唔錯 :P


2023年9月3日星期日

[露營裝備] [露營用品] BUFF X Re:echo 香港地質景觀系列魔術頭巾

BUFF X Re:echo 香港地質景觀系列魔術頭巾

一收到email 就即刻想入手, 尤其六角柱石同菠蘿包都十分靚, 唔講咁多, 睇相~


糧船灣「六角柱石」



大鵬灣水域嘅「東平洲」







橋咀島「菠蘿包石」






黃竹角嘴「鬼手岩」





[露營裝備] [露營用品] FLEXTAIL LIGHT REPEL 便攜軀蚊器

FLEXTAIL LIGHT REPEL 便攜軀蚊器

另一間鋪頭又做會員Crazy Sale, 襯7 折入手左呢個軀蚊器, 無內置電(可能仲襟用), 需要長插USB 線俾電, 同軀蚊燈一樣有兩種模式, Camping Mode 同Outdoor Mode, 同軀蚊燈一樣用同一SIZE 的蚊片, 安裝簡易, 一插電加熱都十分快, Camping Mode 最高溫度可達 110°C, 而Outdoor Mode 更可達到 165°C, 操作十分簡單, 軀蚊效能完全取決於軀蚊片加熱後的效力。配有掛扣加上充電器便可隨身攜帶, 或掛在營內使用。價錢略嫌貴左少少。






[露營裝備] [露營用品] CLAYMORE Capon 200H Cap帽燈, 營燈11 (行山, 探險, 防身, 露營燈)

CLAYMORE Capon 200H

CLAYMORE 出品的燈具愈黎愈多, 呢款夾係CAP 帽的燈之中, 流明最高之一, 所以襯7 折入手, 除左CAP帽燈功能, 另外都可以做營燈, 內置2000mAh鋰電池, 充滿電需要4 小時, 營燈功能最高亮度350 流明, 勉強用到半晚, 所以要較暗少少先可以用到一整晚, Cap帽燈功能, Focused Light Mode 亮度由30 至400 流明, Turbo Mode 亮度由40 至1000 流明, 咁小巧的SIZE 的燈, 係十分足夠, 只要CAP 帽前端的帽舌夠厚夠硬, 燈體都可以夾得很實, 唯獨燈體都算較重, 軟身少少的CAP帽就很難用到, 附送一個扣可以扣起當營燈用, 成日帶帽人仕的貼心選擇, 其實仲可以夾係安全帽等等有硬帽舌的帽上, 另外最正係隨燈附送精美厚身袋仔, 好好咁保護盞燈。







[露營裝備] [露營用品] FENIX E18R V2.0 及 FENIX E35R 電筒10 (行山, 探險, 防身)

襯鋪頭做7 折, 入手多兩支電筒, 兩支電筒都係附送電池, 兩支都可以獨立充電, 唔使折電出黎叉, 兩支都算新款, 不過所用的電池都唔係18650, 細D 的E18R V2.0 係用 16340 ARB-L16-700P 鋰電池, 大D 的E35R 係用 21700 鋰電池。

FENIX E18R V2.0

最近返工的背囊十分重, 執過下D 野, 最後就係換埋支電筒, 其實返工支電筒係備用, 唔使用到18650 咁多電, 所以最後揀左呢支入手, 用 16340 ARB-L16-700P 的電, 得700mAh, 成支電筒仲短過手指, 電量少就預左, 用黎帶出街備用就一流, 最高亮度1200 流明, 其次為350 流明, 150 流明, 30 流明及1流明, 依舊有頻閃, 但無SOS 求救燈, 之前FENIX 的Rechargable 的電筒, 係用磁吸式充電, 而今次呢兩款竟然係用USB TYPE C, 可能磁吸式都係有少少麻煩, 或者充電速度無插入式咁快, 呢次用TYPE C 其實個人黎講覺得仲好, 統一晒去唔使煩 (雖然自己仲有幾支MICRO USB 充電的電筒), 其實呢個系列的電筒賣點係Recharge, 所以都無乜特別野可以講, 不過今次呢兩款對比返之前的E30R, 佢個尾部多左磁鐵, 可以完美90 角吸附係鐵柱上面, 唔會掉落黎, E18R V2.0 咁小巧當然無難度, 但試埋較粗身的E35R 都可以做到, 係值得一讚, 其實試埋180 度倒吊都無問題, 其實呢個功能做野起上黎都真係方便好多。另外就係一米防撞, IP68 防塵防水級別, 個人建議不應長時間停留在水中。













FENIX E35R

呢支口袋SIZE 的電筒, 竟然用21700 電, 即係有5000mAh, 買電筒送埋電池, 唔使特登買粒21700, 雖然話佢係口袋SIZE 的電筒, 但摸上手明顯比起一般口袋SIZE 的電筒粗身, 不過係可接受的程度, 而電池電量咁足, 所以最高亮度都一下子跳到去3100 流明, 其次為1000 流明, 350 流明, 150 流明, 30 流明, 依舊有頻閃, 但無SOS 求救燈, 之前講到, 呢款都係用USB TYPE C 插入式充電, 同樣電筒尾部多了內置磁鐵, 可以90 度甚至180 度吸附係鐵製金屬上, 方便工作期間空出雙手做其他野。另外就係一米防撞, IP68 防塵防水級別, 個人建議不應長時間停留在水中。