[露營裝備] [露營用品] [個人網誌] 再淘營釘及夜光繩子

試過係淘寶買過多次營釘，雖然質素一般，但勝在夠平，今次特意想買一些平頭的營釘，用作釘實營底墊之用，希望平頭營釘唔會拮傷腳板底，因為家人都慣左去到營地著拖鞋。

不過平的都幾難搵，而且唔想買太長的，因為仿SNOWPEAK 款的營釘好多，但都係超長，天氣凍，泥土乾，普通的18CM Y型釘都好難打晒入草地，最後係NATUREHIKE 搵到呢款同普通Y 型釘長度接近的，一於買返黎試下。


NatureHike 的平頭營釘同Y型釘。


再平價D 的Y 型釘，呢次有埋繩，同送左個袋。


夜光繩的夜光效果比預期差，不過主要買呢款係為左佢的硬度同韌力，因為係NH 度買的再粗D 的營繩用多幾次就"梅"，借俾朋友用仲斷左條，唔合格~

[露營心得] 天幕防風繩長度 (起天幕, 風繩, 營繩, 落釘, 天幕柱)

一般係舖頭買返黎的營繩(防風繩)都係4米、5米和6米左右，如果自己買繩返黎剪栽做天幕的防風繩，咁應該要預幾多米好，多得滯就會條條fing，少得滯唔夠用就揼心，其實根據天幕柱的高度，係可以計返天幕柱頂同落釘位的距離，有左呢個距離，再預多小小做調節或綁結之用，就可以知道要幾長的繩至夠，而計算方法唔咁複雜只係用畢氏定理 a² + b² = c²。

而小弟主要用兩種"一人起天幕的方法"來定落釘位同防風繩的角度...

天幕柱落釘法

首先定好天幕柱的位置，之後將天幕柱向天幕的反方向打橫放在地上，天幕柱底仍然係B點，天幕柱頂就是C點，搵到C 點(如防風繩夠多，此處都可以落釘)，再將另一支天幕柱打直放近C點，天幕柱中間正正就是C點之上，而第二支天幕柱的兩端正正就是D和E點。

C、D和E都是可以落釘的位置，D和E的距離較遠，防風繩亦要較長些，∠ACB是45度，∠ADB和∠AEB大約是41.8度，以下就是用畢氏定理計算出來的結果。

45度角落釘法

首先定好天幕柱的位置，之後將天幕柱向天幕的反方向打橫放在地上，天幕柱底仍然係B點，天幕柱頂就是C點，搵到C 點(如防風繩夠多，此處都可以落釘)，再將天幕柱以柱底為圓心向上轉大約45度(直角90度的一半)，天幕柱頂就是D點，將天幕柱回歸BC的位置，再將天幕柱以柱底為圓心向下轉大約45度(直角90度的一半)，天幕柱頂就是就是E點。

C、D和E都是可以落釘的位置，C、D和E的距離一樣，都係天幕柱的長度，∠ACB、∠ADB和∠AEB都是45度，以下就是用畢氏定理計算出來的結果。

[露營裝備] [露營用品] 營繩 (防風繩) (風繩)

一個帳篷所包含的各樣配件中，營繩算係一般用家最無要求的一項，因為繩平，買帳篷和天幕時原裝大多數都包埋營繩和繩扣，原裝的營繩用落又無乜問題，就算質素差的都要用很多很多次才會斷，所以夠用用家就無再要求。

而很多時用家第一次起佢的天幕，先發現原來營繩唔係好夠，勉強起到，但唔算十分穩陣，有部份牌子會俾足晒營繩，天幕上的孔都有足夠的營繩綁住，但亦有一部份係俾唔足，要2米高的天幕柱用一條繩綁住就想挨一晚甚至兩晚，實在太難度高，小弟的第一次很幸運，雖然天幕都係俾唔足繩同繩扣，因為有很多長輩幫手，而自己又淘了些8mm粗的繩，原本諗住用黎做後備繩綁下其他東西，最後給一些長輩拿了去綁樹，第一次起的天幕穩陣得很，仲擋了好幾場雨。

雖然唔係攀石行山，但買定數十米的繩旁身係無防，一接觸返繩呢樣野，就諗起細個童軍的片段，雖然唔係做左好多年童軍，但記得一條繩可以好多用途，好多繩結可以打，就慢慢去搵心目中最佳的營繩，在淘寶都花了很多學費。

10個實用繩結 (1)　10個實用繩結 (2)　2個營釘結教學

一條好的營繩要有咩特點?

堅韌
要係戶外日曬雨淋，被風吹之餘仲要係帳篷天幕和營釘之間拉扯，堅韌係首要條件

彈性
有少許彈性的營繩可以卸去拉扯的力，係保護帳篷天幕的要素，彈性太多又會使營繩或繩扣容易變鬆，所以彈性少許就夠

反光
夜晚防止小孩或途人被絆倒，一個天幕要用的繩起碼8條以上，加上帳篷的營繩，基本上周圍都係繩，所以用反光的營繩，提醒自己及其他人

顏色鮮艷
即使係日間，用綠色泥色黑色白色的繩都會有機會眼花睇錯又跌一鑊，所以一般附送的營繩都係橙色紅色...等等

輕巧
其實營繩一般2mm至3mm 都夠用，唔同牌子唔同地方生產的繩重量都不同，露營講輕量化嘛

價錢
營繩呢樣東西，發覺一係好平，一係就好貴，無乜中價的產品，平嘅就係淘寶$1蚊1米，$50蚊就50米，貴嘅外國貨就百幾二百蚊先得30米，而係香港舖頭賣的都要$5蚊一米，價錢而言，算係中價貨，但賣嘅其實都係$1蚊1米的淘寶貨 :(

各款露營繩介紹...好伏

Logos 4mm x 30m
以為有牌子係大公司舖頭買無走雞，大陸造唔係問題，點知又粗又唔反光，唯有當普通繩用，呢款都要百幾蚊30米，完全唔值~ 唯一抵讚嘅係包裝上的營釘結教學。




淘寶貨3.5mm x 50m
$1蚊1米，顏色、紋理、質素仲好過Logos 4mm 果款，又夠實淨，係可惜唔反光，不過個人幾鍾意，用黎做浪衫繩或者綁下野都唔錯。




淘寶貨3mm x 50m
$1蚊1米，顏色、紋理、質素都唔錯，勝在反光，真真正正的營繩，唔夠樓上果款實淨，但都夠用了，可能仲好添，因為軟身少少的繩打結會實淨一點，香港舖頭賣$5蚊1米，其實都係淘寶貨，去淘寶買喇~




幾款營繩對比圖
由左至右分別為2mm(Naturehike) 3mm(淘寶貨) 3.5mm(淘寶貨) 4mm(Logos)
最左邊都係淘寶的Naturehike挪客平價貨，$12四條4m，內藏金屬線作反光，不過不失，但配個不合SIZE 的營繩扣，令營繩容易鬆掉。




淘寶貨1.8mm x 20m
$18蚊20米，超幼，算實淨，耐唔耐磨要試過先知，夜間能夠反光，做營繩夠晒輕量，可惜手頭上的營繩扣無咁細SIZE，而其他SIZE的營繩都仲有好多，唯有作掛物或綁物之用。




淘寶貨5mm x 10m 夜光
$12蚊10米，夜光效果不明顯，但勝在夠實淨，亦有一定韌力，這個粗度，買來當作繩索之用，做掛繩、綁樹、綁欄桿、連接天幕...等等。




NatureHike 8mm x 12m
$29蚊 12米，原先預用家當作營繩之用，可自行剪開每條3米，附送4 個快速營繩扣，以這個粗度用左營繩應該綽綽有餘，但當作繩子之用，連接天幕綁緊樹或欄桿，多用幾次就會"梅"，繼而斷開，實在不合格。




劣質淘寶貨3mm x 30m
同樣是$1蚊1米，但店主可能找不到足30米的繩給我，就用兩條繩然後火燒焊接給我，接駁位明顯之餘仲唔係好實淨，好似就想斷咁，呢款雖然反光，但質料很差，拿上手會被金屬線界手，第一次唔識買就中伏，最後諗住粗用，但用左幾次後都忍唔住被我掉左。




圖片來源:
深圳穿山甲户外运动
Selpa
naturehike旗舰店
山鹰户外运动装备